Press Release

BIOGRAFIE

JULIE 2019

CORNE LOUW BEÏNDRUK MET ’N VARS MODERNE COUNTRY-POP-AANSLAG


Corne Louw is nie iemand wat musiek op die gewone manier aanpak nie. Sy eerste enkelsnit en ook die titelsnit van sy komende album, DATE NIGHT, is nie net ’n bewys hiervan nie, maar verklap ook meer van wat luisteraars van hierdie moderne kunstenaar, met sy strelende storievertellerstem, kan verwag.

DATE NIGHT is ’n vars en moderne Country-Popsnit wat lekker is om na te luister en jou voete onwillekeurig sal laat jeuk om op die dansvloer uit te kom. Die liedjie, wat deur Corne, Hugo Ludik en Vaughan Gardiner geskryf is, sal aanklank vind by enigiemand wat in ’n verhouding is en wil paartjies herinner om vir mekaar tyd te maak in vandag se gejaagde lewe. “Aan die begin van ’n verhouding word daar baie beloftes gemaak, maar dan gebeur die lewe en is daar verantwoordelikhede wat nagekom moet word. Dit is dan so maklik om verby mekaar te begin leef,” verklap dié liedjieskrywer en musikant oor die boodskap agter sy eerste enkelsnitvrystelling. “Die enkelsnit beteken vir my baie, want dit het met my en my vrou gebeur vandat ons twee wonderwerkies gebore is. ’n Tweeling hou ons heeltemal weg van die dinge wat ons as ’n paartjie altyd saam gedoen het. Maar ons verruil hulle vir niks!”

Die musiekvideo, wat by Fathom Media/ KeyArt Services se ateljee en by perdestalle in Honeydew verfilm is deur Jay Loots en die span van Fathom Media/ KeyArt, dra die boodskap dat ’n mens altyd moet tyd maak om mekaar spesiaal te laat voel. “Die storie handel oor my wat besef dat ons ’n date night nodig het en soos wat ek die liedjie skryf dink ek aan die perfekte afspraak saam met my geliefde,” verklap Corne.

Kyk die video hier:

https://www.youtube.com/watch?v=4DsxQGPv7Tg&feature=youtu.be

DATE NIGHT is ook die titel van sy debuut-album wat binnekort op die rak is en hy het juis die naam so gekies omdat dit ’n konsep is wat gereeld gebruik word. Die CD spog met dertien lekkerluister kuierliedjies in sy kenmerkende moderne Country-Popstyl. Volgens hom, is die album geïnspireer deur sy vrou en kinders en wou hy oor alledaagse gebeurtenisse skryf en ’n storie vertel: “Ek weet dat mense die ‘bokkie-sokkie’ tipe musiek geniet en daar is niks daarmee verkeerd nie. Dis net nie ek nie. Ek wou iets uitbring wat inspireer en wat betekenis het.” Alhoewel die meeste liedjies opgewekte ritmes het, is daar baie emosie in elke snit teenwoordig omdat baie daarvan staaltjies uit sy eie lewe vertel. “Ek hoop dat elkeen wat na die album luister sal kan vereenselwig met die lirieke en dat dit weer vir hulle hoop en moed sal gee vir die toekoms,” sê hy.

Corne woon in Langebaan in die Weskus en het die kuns bemeester om gehore in die palm van sy hand te hou met sy veelsydigheid en hartlike verhoogpersoonlikheid. Hy kom uit ’n familie vol musikante en glo dat musiek deur sy are vloei. Hy en sy pa speel nou nog so af en toe saam kitaar.

Sy ouerhuis was altyd vol musiek, veral Amerikaanse Country-snitte, en dit is waar sy liefde en passie daarvoor gebore is. Alhoewel hy homself leer kitaar speel het, met die hulp van sy tannie, en hy deel was van die Supernovas, het hy eers saam met sy pa ’n besigheid begin voordat sy solo-musiekloopbaan, wat in 2004 afgeskop het, amptelik vlam gevat het.

Sedertdien het hy al by verskeie feeste, waaronder die KKNK en Robertson’s Wacky Wine Festival, plekke soos Route 66 en Ocean Basket en funksies opgetree en sien hy daarna uit om deur die land te toer en sy musiek aan nog nuwe luisteraars bekend te stel.

Omdat hy meen dat musiek die beste manier is om mense te laat weet hoe hy voel, skryf hy graag oor die lewe in die algemeen en hoop hy dat dit êrens iets vir iemand kan beteken. Wanneer hy musiek luister, is dit gewoonlik liedjies met ’n mooi melodie en betekenisvolle lirieke. Natuurlik bly sy grootste liefde Amerikaanse Country en meen hy dat dit die grootste invloed op sy eie styl gehad het. Hy lys oorsese kunstenaars soos George Jones, Randy Travis, Travis Trit en Johnny Cash as van sy gunstelinge en verklap dat Karen Zoid en Riana Nel van sy plaaslike rolmodelle en kunstenaar is saam met wie hy nog graag eendag sou wou werk.

Wanneer hy nie besig is om liedjies te skryf of op te tree nie, hou hy ook baie daarvan om kitare te versamel en deel hy ook dat hy graag ’n argitek of ingenieur sou wou wees as musiek nie vir hom uitgewerk het nie. “Ek is mal oor kitare en het ’n hele versameling Gibsons en Fenders, alhoewel ek nie noodwendig die beste kitaarspeler is nie,” vertel hy met ’n vonkel in sy oog.

Corne Louw glo, net soos George Jones, in eerlike musiek en dat musikante getrou moet wees aan hulleself, omdat aanhangers dit dan meer waardeer. Die vars en moderne benadering en inspirerende vertolking van DATE NIGHT en sy unieke stem, is die perfekte pasmaats vir ’n eindproduk wat nie net ’n vernuwing gaan veroorsaak in die Afrikaanse musiekmark nie, maar ook diep in musiekliefhebbers se harte gaan nesskop.


SNITTE OP DIE ALBUM

1. Date-night
2. Ou Vriende
3. Die Beste deel van my is jy
4. Dis ’n Vooreg
5. Grondpad
6. Bel jou ma
7. Langarm Boogie
8. Ons Leef Nety Een keer
9. Ou Skool Cowboy
10. Maak Of Breek
11. Ek Weet Wat Ek Het In Jou
12. House on Fire
13. Growing up!


Sy enkelsnit DATE-NIGHT is op alle digitale platforms hier beskikbaar:


Apple Music:

https://music.apple.com/za/album/date-night/1469174084?i=1469174085

Spotify:

https://open.spotify.com/track/0C6LFrS1PmnwA7VCT1PqcS?si=KLxwFbiKT-yDfmj-QTjs5g

Deezer:

http://www.deezer.com/track/699001582


SOSIALEMEDIASKAKELS


Facebook: https://www.facebook.com/artistcornelouw/

Instagram: https://www.instagram.com/cornehughlouw/

Webblad: www.cornelouw.co.za


PUBLISITEIT & BEMARKING


Starburst Promosies

Alishia van Deventer

Sel: 083 635 4717

E-pos: alishia@starburstmusic.co.za

Webblad: starburstmusic.co.za